Biodata

Aku datai ari Rumah Imban Ak Rentap, Ulu Lansing, Batang Lemanak, kena pegai menua Sri Aman.Tuai Rumah kami ke bernama Imban Ak Rentap nya apai aku empu. Iya ada ba Lubuk Subung,lemanak.

Aku kala besekula di SK Ng.Kesit, SMK Melugu enggau Kolej DPAH Abdillah, Kuching. Aku mega kala belajar ba palan Pengelatih Pengajar (Maktab Perguruan) Sarawak,Miri. Udah tembu nyak aku lalu ngajar di SMK Batang Igan, SMK Deshon lalu ke diatu aku ngajar di SMK Lanang Sibu.

Aku sigi rindu ke pengawa belagu kenyau ari mit taja jarang enggau orang bepekit belagu. Keterubah ya aku enggau bepekit belagu dalam taun 1994 di Sri Aman, diak aku bulih nombor dua ari 25 iku orang ti bisi enggau bepekit. Nya mih ke meri peransang ngagai aku ngujika diri dalam dunya pemerindang. Dalam taun 1998 aku ngaga siti album di baruh kompeni TBC ti diberi nama “Sulu Baru”. Dalam taun 2001 aku ngaga production kediri empu lalu mansutka album kompilasi ti diberi nama “Timang Buluh Pengerindu” ti diambi ari nama production aku empu, iya nya Buluh Pengerindu Production.

Penanyi bukai ke bisi dalam album kompilasi nya nyengkaum Jian, Elni Lau enggau Nai Dinamik. Album nya digaga ba studio Lelengau Production ti diempu Nai Dinamik. Dalam taun 2003 diak aku mansutka Album “Anak Apai Sali” lalu bisi ngambi Peter John enggau Roy (Pengajar Mail) dalam album nya. Album nya digaga di studio Irama. Album “Tubai Teberunsai” dikeluarka dalam taun 2005 mega digaga di studio Irama. Nyau ka semua lagu dalam album nya tadi digaga aku empu. Dalam taun 2007 aku ngaga studio kediri empu. BPP (Buluh Pengerindu Production) lalu ditukar nama ngagai PBP iya nya Panggau Buluh Pengerindu. Kebuah pia laban awak ke semua nama nya ngena leka jaku Iban, nitih ke siti ari visi PBP ti deka ngangkatka jaku Iban.Tambah mega leka jaku “panggau” tu besai amai reti ba pengidup kitai Iban.